Georgii Buchanani poetae versus inserti
Percipias rerum sit quantula portio, verbis
Quam nos magnificis in regna superba secamus.
Partimur ferro, mercamur sanguine fuso
Ducimus exiguae glebae de parte triumphos.
5
Illa etenim moles per se spectata seorsim
Magna quidem; si cum stellati tegmine caeli
Componas puncti instar erit vel seminis, unde
Condidit innumeros senior Gargetius urbes.
Hec illa est hominum sedes, haec illa ferarum
10
Et volucrum domus: hoc angusto e carcere quantum
Surripit Oceani terrae circumfluus humor
Quique per Herculeae irrumpens divortia metae
Europam Lybicus late seiungit ab horis.
Adde huc claustra Arabum, quaeque arctant aequora campos
15
Hyrcanos, huc adde lacus laxasque paludes.
Et quae precipiti labefactant flumina montes
Vertice, vel pigris stagnant immota lacunis.
Dumque haec vi rapiunt, haec orbem gurgite mergunt
Conditur exiguae sub aquis pars maxima terrae.
20
Quod superest magno velut insula parva profundo
Innatat. Haec etiam quantum vel squalet arenis
Vel tumet in vastos sine fruge, sine arbore montes;
Vel nimiis ardet flammis vel frigore torpet.
Vel iacet humano indocilis mansuescere cultus,
25
Vel fecunda malis animantum in funera succi
O pudor, o stolidi praeceps vesania voti!
Quantula pars rerum est in qua se gloria tollit,
Ira fremit , metus exanimat, dolor urit, egestas
Cogit opes ferro, insidiis flamma atque veneno
30
Scilicet et trepido fervent humana tumultu.